سب مجھے کہتے ہیں بہرا یہ زمانے والے

سب مجھے کہتے ہیں بہرا یہ زمانے والے

جبکہ خود گونگے تھے آواز لگانے والے

میری قیمت نہ لگا پایا خریدار کوئی

بک گئے خود مجھے بازار میں لانے والے

یہ زمانہ بھی زمانہ تو وہی ہے لیکن

بس یہاں لوگ نہیں ہیں وہ پرانے والے

کس بھروسے پہ عدالت میں بھلا جائے کوئی

خود ہی مجرم ہوں جب انصاف دلانے والے

شاید اس واسطے میں تم کو نہیں بھول سکا

یاد رہتے ہیں مجھے مجھ کو بھلانے والے

دوستی ان سے رہی میری سمندر کی طرح

کوششیں کرتے رہے آگ لگانے والے

آج وہ لوگ مرے زخم کا مرہم ہیں نقیؔ

کل تلک مجھ پہ تھے تلوار چلانے والے