sab mujhe kahte hain bahra ye zamane wale

sab mujhe kahte haiñ bahrā ye zamāne vaale

jabki ḳhud gūñge the āvāz lagāne vaale

merī qīmat na lagā paayā ḳharīdār koī

bik ga.e ḳhud mujhe bāzār meñ laane vaale

ye zamāna bhī zamāna to vahī hai lekin

bas yahāñ log nahīñ haiñ vo purāne vaale

kis bharose pe 'adālat meñ bhalā jaa.e koī

ḳhud hī mujrim hoñ jab insāf dilāne vaale

shāyad is vāste maiñ tum ko nahīñ bhuul sakā

yaad rahte haiñ mujhe mujh ko bhulāne vaale

dostī un se rahī merī samundar kī tarah

koshisheñ karte rahe aag lagāne vaale

aaj vo log mire zaḳhm kā marham haiñ 'naqī'

kal talak mujh pe the talvār chalāne vaale

sab mujhe kahte hain bahra ye zamane wale

jabki KHud gunge the aawaz lagane wale

meri qimat na laga paya KHaridar koi

bik gae KHud mujhe bazar mein lane wale

ye zamana bhi zamana to wahi hai lekin

bas yahan log nahin hain wo purane wale

kis bharose pe 'adalat mein bhala jae koi

KHud hi mujrim hon jab insaf dilane wale

shayad is waste main tum ko nahin bhul saka

yaad rahte hain mujhe mujh ko bhulane wale

dosti un se rahi meri samundar ki tarah

koshishen karte rahe aag lagane wale

aaj wo log mere zaKHm ka marham hain 'naqi'

kal talak mujh pe the talwar chalane wale