sab qarine usi dildar ke rakh dete hain

sab qarīne usī dildār ke rakh dete haiñ

ham ġhazal meñ bhī hunar yaar ke rakh dete haiñ

shāyad aa jaa.eñ kabhī chashm-e-ḳharīdār meñ ham

jaan o dil biich meñ bāzār ke rakh dete haiñ

taaki ta.ana na mile ham ko tunuk-zarfī kā

ham qadah sāmne aġhyār ke rakh dete haiñ

ab kise ranj-e-asīrī ki qafas meñ sayyād

saare manzar gul-o-gulzār ke rakh dete haiñ

zikr-e-jānāñ meñ ye duniyā ko kahāñ le aa.e

log kyuuñ mas.ale bekār ke rakh dete haiñ

vaqt vo rañg dikhātā hai ki ahl-e-dil bhī

tāq-e-nisyāñ pe suḳhan yaar ke rakh dete haiñ

zindagī terī amānat hai magar kyā kiije

log ye bojh bhī thak-hār ke rakh dete haiñ

ham to chāhat meñ bhī 'ġhālib' ke muqallid haiñ 'farāz'

jis pe marte haiñ use maar ke rakh dete haiñ

sab qarine usi dildar ke rakh dete hain

hum ghazal mein bhi hunar yar ke rakh dete hain

shayad aa jaen kabhi chashm-e-KHaridar mein hum

jaan o dil bich mein bazar ke rakh dete hain

taki tana na mile hum ko tunuk-zarfi ka

hum qadah samne aghyar ke rakh dete hain

ab kise ranj-e-asiri ki qafas mein sayyaad

sare manzar gul-o-gulzar ke rakh dete hain

zikr-e-jaanan mein ye duniya ko kahan le aae

log kyun masale bekar ke rakh dete hain

waqt wo rang dikhata hai ki ahl-e-dil bhi

taq-e-nisyan pe suKHan yar ke rakh dete hain

zindagi teri amanat hai magar kya kije

log ye bojh bhi thak-haar ke rakh dete hain

hum to chahat mein bhi 'ghaalib' ke muqallid hain 'faraaz'

jis pe marte hain use mar ke rakh dete hain