sab samajhte aur hain haalat hamari aur hai

sab samajhte aur haiñ hālat hamārī aur hai

aur bīmārī hai kuchh bīmār-dārī aur hai

ālam-e-hastī meñ kyā dam le bashar ai hamdamo

aage is rah-rau ko manzil is se bhārī aur hai

dekheñ kyā sūrat ho iz.hār-e-safā meñ pesh-e-yār

aaj ā.eñge ki phir kuchh rū-bakārī aur hai

zaḳhm-e-zāhir par lagā marham to is se fā.eda

pahlū-e-dil meñ nihāñ ik zaḳhm kaarī aur hai

terī muta'āqib chalī aatī hai gulshan meñ ḳhizāñ

do hī din meñ rang ai abr-e-bahārī aur hai

motiyā kī gar nahīñ achchhī to jaane do na lo

maiñ ne champe kī sharāb ai gul utārī aur hai

ik ġhazal andāz par 'nāsiḳh' ke ai 'bāqī' likho

qāfiye achchhe haiñ gar marzī tumhārī aur hai

sab samajhte aur hain haalat hamari aur hai

aur bimari hai kuchh bimar-dari aur hai

aalam-e-hasti mein kya dam le bashar ai hamdamo

aage is rah-rau ko manzil is se bhaari aur hai

dekhen kya surat ho izhaar-e-safa mein pesh-e-yar

aaj aaenge ki phir kuchh ru-bakari aur hai

zaKHm-e-zahir par laga marham to is se faeda

pahlu-e-dil mein nihan ek zaKHm kari aur hai

teri muta'aqib chali aati hai gulshan mein KHizan

do hi din mein rang ai abr-e-bahaari aur hai

motiya ki gar nahin achchhi to jaane do na lo

main ne champe ki sharab ai gul utari aur hai

ek ghazal andaz par 'nasiKH' ke ai 'baqi' likho

qafiye achchhe hain gar marzi tumhaari aur hai