sab samajhte hain ki hum jit ke qabil nahin hain

sab samajhte haiñ ki ham jiit ke qābil nahīñ haiñ

sirf itnā hai abhī khel meñ shāmil nahīñ haiñ

āstīnoñ pe lahū hai to lahū hai apnā

apne qātil haiñ kisī aur ke qātil nahīñ haiñ

kabhī teshe ko uThā.e kabhī talvār liye

ab ye baazū tirī gardan meñ hamā.il nahīñ haiñ

ham bure haiñ ki natīje meñ havas ke haiñ yahāñ

ham bure haiñ ki kisī 'ishq kā hāsil nahīñ haiñ

aur duniyā faqat āñkhoñ ke sivā kuchh bhī nahīñ

ham vo manzar haiñ jo āñkhoñ ke muqābil nahīñ haiñ

jo haiñ sāhil vo samundar nahīñ ho sakte the

jo samundar haiñ to yuuñ haiñ ki vo sāhil nahīñ haiñ

phir kisī mohnī sūrat se mohabbat hogī

abhī ġhusse meñ haiñ par husn se bad-dil nahīñ haiñ

sab samajhte hain ki hum jit ke qabil nahin hain

sirf itna hai abhi khel mein shamil nahin hain

aastinon pe lahu hai to lahu hai apna

apne qatil hain kisi aur ke qatil nahin hain

kabhi teshe ko uThae kabhi talwar liye

ab ye bazu teri gardan mein hamail nahin hain

hum bure hain ki natije mein hawas ke hain yahan

hum bure hain ki kisi 'ishq ka hasil nahin hain

aur duniya faqat aankhon ke siwa kuchh bhi nahin

hum wo manzar hain jo aankhon ke muqabil nahin hain

jo hain sahil wo samundar nahin ho sakte the

jo samundar hain to yun hain ki wo sahil nahin hain

phir kisi mohni surat se mohabbat hogi

abhi ghusse mein hain par husn se bad-dil nahin hain