sab sikandar ghaznawi babar ke shaidai mile

sab sikandar ġhaznavī bābar ke shaidā.ī mile

koī to mujh ko yahāñ poras kā bhī bhaa.ī mile

ab bhī hai insāñ jahālat ke usī me'yār par

aaj bhī mansūr aa jaa.e to rusvā.ī mile

chāhatoñ meñ bas ḳhasāra hī ḳhasāra hai magar

log jitne bhī mile chāhat ke shaidā.ī mile

thak chuke haiñ raat din kī anjuman-ārā.ī se

ai hujūm-e-shahr ab thoḌī sī tanhā.ī mile

baḳhsh diije ab hameñ bhī bāryābī kā sharaf

muntazir kab se khaḌe haiñ kuchh to shunavā.ī mile

fikr kī gahrā.ī se nikle achhūtā jab ḳhayāl

kyoñ na har mahfil meñ phir us ko pazīrā.ī mile

dost shāmil ho ga.e 'ḳhālid' 'adū kī fauj meñ

mo'jiza hogā agar ab bhī na paspā.ī mile

sab sikandar ghaznawi babar ke shaidai mile

koi to mujh ko yahan poras ka bhi bhai mile

ab bhi hai insan jahaalat ke usi me'yar par

aaj bhi mansur aa jae to ruswai mile

chahaton mein bas KHasara hi KHasara hai magar

log jitne bhi mile chahat ke shaidai mile

thak chuke hain raat din ki anjuman-arai se

ai hujum-e-shahr ab thoDi si tanhai mile

baKHsh dije ab hamein bhi baryabi ka sharaf

muntazir kab se khaDe hain kuchh to shunawai mile

fikr ki gahrai se nikle achhuta jab KHayal

kyon na har mahfil mein phir us ko pazirai mile

dost shamil ho gae 'KHalid' 'adu ki fauj mein

mo'jiza hoga agar ab bhi na paspai mile