sab ThaTh ye ek bund se qudrat ki bana hai

sab ThāTh ye ik buuñd se qudrat kī banā hai

yaañ aur kisī kī na manī hai na manā hai

bil-farz agar ham hue havvā ke shikam se

aadam ke ta.iiñ dekhiye vo kis kā janā hai

yaañ log dulhan dūlhā ke qisse meñ phañse haiñ

vaañ aur bunat hai na banī hai na banā hai

hikmat kā ulaT-pher nahīñ jin kī nazar meñ

vo kahte haiñ ġhāfil ye baqā hai ye fanā hai

le arsh se tā-farsh jo raushan hai tilismāt

ye nuur sab us nuur kī chhalnī se chhanā hai

ham kachche se kachchā ise samjhe haiñ vagarna

us deg ke chāval meñ kanī hai na kanā hai

milnā bhī ġharaz kā hai laḌā.ī bhī ġharaz kī

nahīñ aur kisī se koī rūThā na manā hai

hājat na bar aa.ī to vahīñ karne lage hajv

aur ho gayā matlab to vahīñ vasf-o-sanā hai

yābis kahīñ martūb kahīñ garm kahīñ sard

misrī meñ kahīñ zahr halāhil meñ sanā hai

ek is kī davā samjhī nahīñ jaatī 'nazīr' aah

kuchh zor hī ma.ajūn kā nusḳha ye banā hai

sab ThaTh ye ek bund se qudrat ki bana hai

yan aur kisi ki na mani hai na mana hai

bil-farz agar hum hue hawwa ke shikam se

aadam ke tain dekhiye wo kis ka jana hai

yan log dulhan dulha ke qisse mein phanse hain

wan aur bunat hai na bani hai na bana hai

hikmat ka ulaT-pher nahin jin ki nazar mein

wo kahte hain ghafil ye baqa hai ye fana hai

le arsh se ta-farsh jo raushan hai tilismat

ye nur sab us nur ki chhalni se chhana hai

hum kachche se kachcha ise samjhe hain wagarna

us deg ke chawal mein kani hai na kana hai

milna bhi gharaz ka hai laDai bhi gharaz ki

nahin aur kisi se koi ruTha na mana hai

hajat na bar aai to wahin karne lage hajw

aur ho gaya matlab to wahin wasf-o-sana hai

yabis kahin martub kahin garm kahin sard

misri mein kahin zahr halahil mein sana hai

ek is ki dawa samjhi nahin jati 'nazir' aah

kuchh zor hi majun ka nusKHa ye bana hai