sab udhar bhagen jidhar se teri KHushbu aae

sab udhar bhāgeñ jidhar se tirī ḳhushbū aa.e

ham ko zid hai hameñ lene ke liye tū aa.e

aa ga.e saare havā-ḳhvāh kamāneñ le kar

dasht meñ ram ke liye jab mire aahū aa.e

āb-e-zar se bhī kahīñ pyaas bujhā kartī hai

koī dariyā koī tālāb koī jū aa.e

ham se bantīñ nahīñ lafzoñ kī fasīleñ ki hameñ

tujh sā bātoñ kā hunar aa.e na jaadū aa.e

ham samajhte haiñ na samjheñge ishāroñ kī zabāñ

aañkh aa.e ki shikan aa.e ki abrū aa.e

e'tibār us kī qasam kā bhī na karnā 'bāqar'

koī hāthoñ meñ agar le ke tarāzū aa.e

sab udhar bhagen jidhar se teri KHushbu aae

hum ko zid hai hamein lene ke liye tu aae

aa gae sare hawa-KHwah kamanen le kar

dasht mein ram ke liye jab mere aahu aae

aab-e-zar se bhi kahin pyas bujha karti hai

koi dariya koi talab koi ju aae

hum se bantin nahin lafzon ki fasilen ki hamein

tujh sa baaton ka hunar aae na jadu aae

hum samajhte hain na samjhenge ishaaron ki zaban

aankh aae ki shikan aae ki abru aae

e'tibar us ki qasam ka bhi na karna 'baqar'

koi hathon mein agar le ke taraazu aae