sab umr to jari nahin rahta hai safar bhi

sab umr to jaarī nahīñ rahtā hai safar bhī

aatā hai kisī din to bashar lauT ke ghar bhī

manzil to baḌī shai na milī rāhguzar bhī

bāñdhā thā baḌe shauq se kyā raḳht-e-safar bhī

andar se phahoñde hue dīvār bhī dar bhī

dekhe haiñ baḌe logoñ ke ham ne baḌe ghar bhī

har samt hai vīrānī sī vīrānī kā aalam

ab ghar sā nazar aane lagā hai mirā ghar bhī

tanhā.ī-pasand itnā bhī mat ban ye samajh le

tanhā.ī meñ hai chain to tanhā.ī meñ Dar bhī

pāgal hai patā pūchh rahā hai mire ghar kā

kyā ḳhāna-ba-doshoñ kā huā kartā hai ghar bhī

sab umr to jari nahin rahta hai safar bhi

aata hai kisi din to bashar lauT ke ghar bhi

manzil to baDi shai na mili rahguzar bhi

bandha tha baDe shauq se kya raKHt-e-safar bhi

andar se phahonde hue diwar bhi dar bhi

dekhe hain baDe logon ke hum ne baDe ghar bhi

har samt hai virani si virani ka aalam

ab ghar sa nazar aane laga hai mera ghar bhi

tanhai-pasand itna bhi mat ban ye samajh le

tanhai mein hai chain to tanhai mein Dar bhi

pagal hai pata puchh raha hai mere ghar ka

kya KHana-ba-doshon ka hua karta hai ghar bhi