sab usul-e-zindagi be-kar ho ke rah gae

sab usūl-e-zindagī be-kār ho ke rah ga.e

ham asīr-e-kākul-e-dildār ho ke rah ga.e

hāl-e-dil nā-qābil iz.hār ho ke rah gayā

ham kisī ke naḳhroñ se bezār ho ke rah ga.e

vo jo hirnoñ kī tarah chaukaḌiyāñ bharte the kabhī

vaqt kī raftār se lāchār ho ke rah ga.e

jaane vaalā chal basā dāġh-e-judā.ī de gayā

aur sab ahbāb shabnam-bār ho ke rah ga.e

bā.is-e-ibrat hai kaise kaise qad-āvar daraḳht

āñdhiy.oñ meñ vaqt kī hamvār ho ke rah ga.e

jo shagūfe zīnat-e-gulzār the sāhab kabhī

phuul ban ke raunaq-e-bāzār ho ke rah ga.e

ham samajhte the jinheñ sālār-e-amn-o-āshtī

haif vo bhī surḳhi-e-aḳhbār ho ke rah ga.e

kyā hamāre saa.e meñ ārām farmā.e koī

ham to bas girtī huī dīvār ho ke rah ga.e

kyā shikāyat kījiye 'nāmī' kisī begāne kī

apne bhī to bā.is-e-āzār ho ke rah ga.e

sab usul-e-zindagi be-kar ho ke rah gae

hum asir-e-kakul-e-dildar ho ke rah gae

haal-e-dil na-qabil izhaar ho ke rah gaya

hum kisi ke naKHron se bezar ho ke rah gae

wo jo hirnon ki tarah chaukaDiyan bharte the kabhi

waqt ki raftar se lachaar ho ke rah gae

jaane wala chal basa dagh-e-judai de gaya

aur sab ahbab shabnam-bar ho ke rah gae

bais-e-ibrat hai kaise kaise qad-awar daraKHt

aandhiyon mein waqt ki hamwar ho ke rah gae

jo shagufe zinat-e-gulzar the sahab kabhi

phul ban ke raunaq-e-bazar ho ke rah gae

hum samajhte the jinhen salar-e-amn-o-ashti

haif wo bhi surKHi-e-aKHbar ho ke rah gae

kya hamare sae mein aaram farmae koi

hum to bas girti hui diwar ho ke rah gae

kya shikayat kijiye 'nami' kisi begane ki

apne bhi to bais-e-azar ho ke rah gae