sab uTh jaenge parde darmiyan se

sab uTh jā.eñge parde darmiyāñ se

ishāra to kareñ vo lā-makāñ se

chune tā-umr kāñTe gulsitāñ se

kabhī ujrat na māñgī bāġhbāñ se

bahut ūñchā sahī vo arsh lekin

bahut nīchā hai tere āstāñ se

mire husn-e-taḳhyyul ke karishme

tire jalve nikalte haiñ yahāñ se

uḌā do gard maiḳhāne kī rindo

laḌā do āsmāñ ko āsmāñ se

sarāpā gosh-bar-āvāz huuñ maiñ

na jaane dī sadā us ne kahāñ se

kabhī to jhāñk maiḳhāne meñ zāhid

nazar aa jā.egī jannat yahāñ se

'musavvir' aap hai tasvīr apnī

sunā tasvīr-e-goyā kī zabāñ se

sab uTh jaenge parde darmiyan se

ishaara to karen wo la-makan se

chune ta-umr kanTe gulsitan se

kabhi ujrat na mangi baghban se

bahut uncha sahi wo arsh lekin

bahut nicha hai tere aastan se

mere husn-e-taKHyyul ke karishme

tere jalwe nikalte hain yahan se

uDa do gard maiKHane ki rindo

laDa do aasman ko aasman se

sarapa gosh-bar-awaz hun main

na jaane di sada us ne kahan se

kabhi to jhank maiKHane mein zahid

nazar aa jaegi jannat yahan se

'musawwir' aap hai taswir apni

suna taswir-e-goya ki zaban se