sab wa hain dariche to hawa kyon nahin aati

sab vā haiñ darīche to havā kyoñ nahīñ aatī

chup kyoñ haiñ parindoñ kī sadā kyoñ nahīñ aatī

gul khilne kā mausam hai to phir kyoñ nahīñ khilte

ḳhāmosh haiñ kyoñ peḌ sabā kyoñ nahīñ aatī

be-ḳhvāb kivāḌoñ pe havā detī hai dastak

so.e hue logoñ ko jagā kyoñ nahīñ detī

sunte haiñ ki manzar hai badalne ko chaman kā

phir is kī gavāhī kī nidā kyoñ nahīñ aatī

kyoñ ek se lagte haiñ yahāñ ab sabhī mausam

ḳhushbū kisī mausam se judā kyoñ nahīñ hotī

sonā hai mujhe ab to vahī oḌh ke 'shabnam'

mere liye phūloñ kī ridā kyoñ nahīñ aatī

sab wa hain dariche to hawa kyon nahin aati

chup kyon hain parindon ki sada kyon nahin aati

gul khilne ka mausam hai to phir kyon nahin khilte

KHamosh hain kyon peD saba kyon nahin aati

be-KHwab kiwaDon pe hawa deti hai dastak

soe hue logon ko jaga kyon nahin deti

sunte hain ki manzar hai badalne ko chaman ka

phir is ki gawahi ki nida kyon nahin aati

kyon ek se lagte hain yahan ab sabhi mausam

KHushbu kisi mausam se juda kyon nahin hoti

sona hai mujhe ab to wahi oDh ke 'shabnam'

mere liye phulon ki rida kyon nahin aati