saba ko fikr hai kaba naya banane ki

sabā ko fikr hai ka.aba nayā banāne kī

ki jam.a kartī hai ḳhaak un ke āstāne kī

falak ko zid hai nasheman mirā miTāne kī

chaman meñ dhun hai mujhe āshiyāñ banāne kī

zamīñ pe lāla-o-gul se hai ibtadā-e-bayāñ

shafaq hai āḳhirī surḳhī mire fasāne kī

isī se niklegā ta.amīr kā bhī ik pahlū

zarūr chāhiye taḳhrīb āshiyāne kī

hazār jalva-e-be-rañg sad matā.a-e-nazar

nahīñ hai husn ko hājat naqāb uThāne kī

khulā ye raaz ki thiiñ kis qadar fareb-e-nazar

ajal ke bhes meñ rañgīniyāñ zamāne kī

asīro kar lo nasheman kā āḳhirī mātam

qafas meñ aa.ī hai ḳhaak uḌ ke āshiyāne kī

sunī thī vus.at-e-duniyā kī dāstāñ ham ne

magar milī na jagah āshiyāñ banāne kī

ye kah ke palTe haiñ duniyā ke dekhne vaale

ki ye jagah nahīñ vallāh dil lagāne kī

banā bahār meñ ujḌā ḳhizāñ meñ ai 'afqar'

haqīqat itnī hī bas apne āshiyāne kī

saba ko fikr hai kaba naya banane ki

ki jama karti hai KHak un ke aastane ki

falak ko zid hai nasheman mera miTane ki

chaman mein dhun hai mujhe aashiyan banane ki

zamin pe lala-o-gul se hai ibtada-e-bayan

shafaq hai aaKHiri surKHi mere fasane ki

isi se niklega tamir ka bhi ek pahlu

zarur chahiye taKHrib aashiyane ki

hazar jalwa-e-be-rang sad mataa-e-nazar

nahin hai husn ko hajat naqab uThane ki

khula ye raaz ki thin kis qadar fareb-e-nazar

ajal ke bhes mein ranginiyan zamane ki

asiro kar lo nasheman ka aaKHiri matam

qafas mein aai hai KHak uD ke aashiyane ki

suni thi wusat-e-duniya ki dastan hum ne

magar mili na jagah aashiyan banane ki

ye kah ke palTe hain duniya ke dekhne wale

ki ye jagah nahin wallah dil lagane ki

bana bahaar mein ujDa KHizan mein ai 'afqar'

haqiqat itni hi bas apne aashiyane ki