saba ko le ke harim-e-chaman se nikli hai

sabā ko le ke harīm-e-chaman se niklī hai

vo ik adā ki tire bāñkpan se niklī hai

lajā ke ḳhud se nihāñ ho ga.ī hai phūloñ meñ

shamīm-e-ḳhush ki tire pairahan se niklī hai

ba-rang-e-nūr jhalaktī hai māh-o-anjum meñ

ziyā jo terī jabīñ kī kiran se niklī hai

latīf-tar ho subuk-tar ho nāz-parvar ho

mahak ye apne alāva saman se niklī hai

tumhārī chashm se miltī hai nargis-e-shahlā

shabīh-e-ġhuncha tumhāre dahan se niklī hai

tumhīñ ho mojid-e-naġhma tumhīñ ho ḳhāliq-e-sher

ravish ġhazal kī tumhāre chalan se niklī hai

adā-shanās-e-nigārāñ hamīñ to haiñ 'az.har'

sanā-e-husn ham ahl-e-suḳhan se niklī hai

saba ko le ke harim-e-chaman se nikli hai

wo ek ada ki tere bankpan se nikli hai

laja ke KHud se nihan ho gai hai phulon mein

shamim-e-KHush ki tere pairahan se nikli hai

ba-rang-e-nur jhalakti hai mah-o-anjum mein

ziya jo teri jabin ki kiran se nikli hai

latif-tar ho subuk-tar ho naz-parwar ho

mahak ye apne alawa saman se nikli hai

tumhaari chashm se milti hai nargis-e-shahla

shabih-e-ghuncha tumhaare dahan se nikli hai

tumhin ho mojid-e-naghma tumhin ho KHaliq-e-sher

rawish ghazal ki tumhaare chalan se nikli hai

ada-shanas-e-nigaran hamin to hain 'azhar'

sana-e-husn hum ahl-e-suKHan se nikli hai