saba ne kan mein aa kar kaha mile hi nahin

sabā ne kaan meñ aa kar kahā mile hī nahīñ

hasīn log tire gaañv meñ rahe hī nahīñ

hameñ kyā 'ilm ki kyā shai hai ābla-pā.ī

ham apne kamre se bāhar kabhī ga.e hī nahīñ

hameñ bachāne pe raazī thā ik jahān magar

phir ek moḌ vo aayā ki ham bache hī nahīñ

tamām shahr ne mil-jul ke kar liye taqsīm

ye hādsāt mire yaar jab Tale hī nahīñ

mujhe girāne pe āñdhī kā zor thā kitnā

mere lagā.e hue peḌ to gire hī nahīñ

saba ne kan mein aa kar kaha mile hi nahin

hasin log tere ganw mein rahe hi nahin

hamein kya 'ilm ki kya shai hai aabla-pai

hum apne kamre se bahar kabhi gae hi nahin

hamein bachane pe raazi tha ek jahan magar

phir ek moD wo aaya ki hum bache hi nahin

tamam shahr ne mil-jul ke kar liye taqsim

ye hadsat mere yar jab Tale hi nahin

mujhe girane pe aandhi ka zor tha kitna

mere lagae hue peD to gire hi nahin