saba-o-gul ko mah-o-najm ko diwana kiya

sabā-o-gul ko mah-o-najm ko divāna kiyā

mirī sarisht ne har rañg ko nishāna kiyā

vahī bahār jise tum bahār kahte ho

sulūk ham se bahut us ne bāġhiyāna kiyā

jahāñ bhī tez havāoñ ne saath chhoḌ diyā

ġhubār-e-rāh ne apnā vahīñ Thikāna kiyā

ham āḳhir us ke ḳhad-o-ḳhāl dekhte kaise

hamesha us ne qarīb aane se bahāna kiyā

suḳhanvarī kī ijāzat to dil ne de dī thī

magar zabān ne iz.hār-e-mudda.ā na kiyā

sahar kī aañkh se aañsū Tapak na jaa.eñ 'na.īm'

ye soch kar na bayāñ raat kā fasāna kiyā

saba-o-gul ko mah-o-najm ko diwana kiya

meri sarisht ne har rang ko nishana kiya

wahi bahaar jise tum bahaar kahte ho

suluk hum se bahut us ne baghiyana kiya

jahan bhi tez hawaon ne sath chhoD diya

ghubar-e-rah ne apna wahin Thikana kiya

hum aaKHir us ke KHad-o-KHal dekhte kaise

hamesha us ne qarib aane se bahana kiya

suKHanwari ki ijazat to dil ne de di thi

magar zaban ne izhaar-e-muddaa na kiya

sahar ki aankh se aansu Tapak na jaen 'naim'

ye soch kar na bayan raat ka fasana kiya