sabhi amiron ke taj KHatre mein aa gae the

sabhī amīroñ ke taaj ḳhatre meñ aa ga.e the

kuchh aise sikke hamāre kaase meñ aa ga.e the

hameñ bhī fāqa-kashī ne kāfir banā diyā hai

ḳhayāl roTī ke aaj sajde meñ aa ga.e the

tumhāre āñgan kī titliyāñ thiiñ hamāre ghar meñ

hamāre jugnū tumhāre kamre meñ aa ga.e the

gayā jo mandir to phir na masjid kī chhat pe baiThā

mizāj logoñ ke ik parinde meñ aa ga.e the

kisī bhī goshe meñ chāhatoñ kī tapish nahīñ thī

vo terā dil thā yā sard-ḳhāne meñ aa ga.e the

maiñ aadhā paḌh kar vafā ke qisse ko chhoḌ aaya

tumhārī bastī ke log qisse meñ aa ga.e the

bichhaḌte lamhe jo ashk hāthoñ pe aa girā thā

tamām dariyā us ek qatre meñ aa ga.e the

use mohabbat kī pā.emālī nahīñ kahoge

'razā' vo milne kisī ke sadqe meñ aa ga.e the

sabhi amiron ke taj KHatre mein aa gae the

kuchh aise sikke hamare kase mein aa gae the

hamein bhi faqa-kashi ne kafir bana diya hai

KHayal roTi ke aaj sajde mein aa gae the

tumhaare aangan ki titliyan thin hamare ghar mein

hamare jugnu tumhaare kamre mein aa gae the

gaya jo mandir to phir na masjid ki chhat pe baiTha

mizaj logon ke ek parinde mein aa gae the

kisi bhi goshe mein chahaton ki tapish nahin thi

wo tera dil tha ya sard-KHane mein aa gae the

main aadha paDh kar wafa ke qisse ko chhoD aaya

tumhaari basti ke log qisse mein aa gae the

bichhaDte lamhe jo ashk hathon pe aa gira tha

tamam dariya us ek qatre mein aa gae the

use mohabbat ki paemali nahin kahoge

'raza' wo milne kisi ke sadqe mein aa gae the