sabhi do-ghaDi ke hain mehman yahan roz kis ka qiyam hai

sabhī do-ghaḌī ke haiñ mehmāñ yahāñ roz kis kā qiyām hai

jo vafā kī raah meñ miT ga.ī usī zindagī ko davām hai

ye usuul kaisā usuul hai ai faqīh-e-shahr javāb de

vahī tū kare to halāl hai vahī maiñ karūñ to harām hai

isī āb-o-tāb ke saath hī haañ jahāñ meñ baaqī hai aaj bhī

jo na miT sakā na badal sakā vo kalām rab kā kalām hai

mujhe haq hī kyā jo tire sivā kisī dūsre se karūñ vafā

mirā nafs terā ġhulām hai mirī zindagī tire naam hai

milīñ mujrimoñ ko muāfiyāñ huiiñ be-ḳhatāoñ ko phāñsiyāñ

ye usuul kaisā usuul hai ye nizām kaisā nizām hai

tū nahīñ jo ai mire ham-nashīñ to jahāñ kī rut hī badal ga.ī

na vo dhuup hai na vo chhāñv hai na vo sub.h hai na vo shaam hai

use apne paas biThā.ūñ kyoñ dil-o-jān us pe luTā.ūñ kyoñ

jo hai fitna-parvar-o-ḳhud-ġharaz use duur hī se salām hai

sar-e-bazm 'tābish'-e-ḳhush-navā tū na chheḌ naġhma-e-jāñ-fazā

ye hai shaiḳh-e-vaqt kī ḳhānqah yahāñ sher-goī harām hai

sabhi do-ghaDi ke hain mehman yahan roz kis ka qiyam hai

jo wafa ki rah mein miT gai usi zindagi ko dawam hai

ye usul kaisa usul hai ai faqih-e-shahr jawab de

wahi tu kare to halal hai wahi main karun to haram hai

isi aab-o-tab ke sath hi han jahan mein baqi hai aaj bhi

jo na miT saka na badal saka wo kalam rab ka kalam hai

mujhe haq hi kya jo tere siwa kisi dusre se karun wafa

mera nafs tera ghulam hai meri zindagi tere nam hai

milin mujrimon ko muafiyan huin be-KHataon ko phansiyan

ye usul kaisa usul hai ye nizam kaisa nizam hai

tu nahin jo ai mere ham-nashin to jahan ki rut hi badal gai

na wo dhup hai na wo chhanw hai na wo subh hai na wo sham hai

use apne pas biThaun kyon dil-o-jaan us pe luTaun kyon

jo hai fitna-parwar-o-KHud-gharaz use dur hi se salam hai

sar-e-bazm 'tabish'-e-KHush-nawa tu na chheD naghma-e-jaan-faza

ye hai shaiKH-e-waqt ki KHanqah yahan sher-goi haram hai