سبھی خداؤں سے تیری امان چاہتی ہے

سبھی خداؤں سے تیری امان چاہتی ہے

الٰہی اب کے زمیں آسمان چاہتی ہے

اندھیرے بارگہہ رب سے اذن پاتے ہیں

یہ روشنی ہی چراغوں کی جان چاہتی ہے

اسے بدن کی حقیقت سے ہم کنار کرو

وہ روح زادی غلط امتحان چاہتی ہے

میں جانتا ہوں تری بات بن چکی ہے کہیں

مگر یہ تلخ حقیقت گمان چاہتی ہے

مجھے نگاہوں کی بھاشا نہیں سمجھ آتی

مری امید تمہاری زبان چاہتی ہے

ہمیں نہ باغ ارم چاہیئے نہ جام جم

ہماری تیشہ مزاجی چٹان چاہتی ہے

ہزار سالوں کی پیاسی یہ دشت کی دیوی

نواح نجد کا ایک اور جوان چاہتی ہے