sabhi KHudaon se teri aman chahti hai

sabhī ḳhudāoñ se terī amaan chāhtī hai

ilāhī ab ke zamīñ āsmān chāhtī hai

añdhere bārgah-e-rab se izn paate haiñ

ye raushnī hī charāġhoñ kī jaan chāhtī hai

use badan kī haqīqat se ham-kanār karo

vo rūh-zādī ġhalat imtihān chāhtī hai

maiñ jāntā huuñ tirī baat ban chukī hai kahīñ

magar ye talḳh haqīqat gumān chāhtī hai

mujhe nigāhoñ kī bhāshā nahīñ samajh aatī

mirī umiid tumhārī zabān chāhtī hai

hameñ na bāġh-e-iram chāhiye na jām-e-jam

hamārī tesha-mizājī chaTān chāhtī hai

hazār sāloñ kī pyāsī ye dasht kī devī

navāh-e-najd kā ek aur javān chāhtī hai

sabhi KHudaon se teri aman chahti hai

ilahi ab ke zamin aasman chahti hai

andhere bargah-e-rab se izn pate hain

ye raushni hi charaghon ki jaan chahti hai

use badan ki haqiqat se ham-kanar karo

wo ruh-zadi ghalat imtihan chahti hai

main jaanta hun teri baat ban chuki hai kahin

magar ye talKH haqiqat guman chahti hai

mujhe nigahon ki bhasha nahin samajh aati

meri umid tumhaari zaban chahti hai

hamein na bagh-e-iram chahiye na jam-e-jam

hamari tesha-mizaji chaTan chahti hai

hazar salon ki pyasi ye dasht ki dewi

nawah-e-najd ka ek aur jawan chahti hai