sabhi ko KHwahish-e-tasKHir-e-shauq-e-hukmarani hai

sabhī ko ḳhvāhish-e-tasḳhīr-e-shauq-e-hukmarānī hai

hameñ lagtā hai apnā dil nahīñ ik rājdhānī hai

yahīñ tahrīr hai lamhāt-e-sar-basta ke afsāne

kitāb-e-zindagī ke har varaq par ik kahānī hai

shikast-o-reḳht kā manzar mirī āñkhoñ meñ rahne do

mujhe apne hī ḳhvāboñ kī abhī qīmat chukānī hai

ta.alluq TuuT jaane se mohabbat mar nahīñ jaatī

ye vo dariyā hai jis meñ bas ravānī hī ravānī hai

ye mere ashk-e-āvāra siyah-rātoñ meñ jugnū haiñ

sajā le apnī palkoñ par unheñ maiñ zau-fishānī hai

zarā badle nahīñ haiñ gaañv se ham shahr meñ aa kar

hamāre ḳhuun meñ zākir vahī saj-dhaj purānī hai

sabhi ko KHwahish-e-tasKHir-e-shauq-e-hukmarani hai

hamein lagta hai apna dil nahin ek rajdhani hai

yahin tahrir hai lamhat-e-sar-basta ke afsane

kitab-e-zindagi ke har waraq par ek kahani hai

shikast-o-reKHt ka manzar meri aankhon mein rahne do

mujhe apne hi KHwabon ki abhi qimat chukani hai

talluq TuT jaane se mohabbat mar nahin jati

ye wo dariya hai jis mein bas rawani hi rawani hai

ye mere ashk-e-awara siyah-raaton mein jugnu hain

saja le apni palkon par unhen main zau-fishani hai

zara badle nahin hain ganw se hum shahr mein aa kar

hamare KHun mein zakir wahi saj-dhaj purani hai