sabhi se hum nahin khulte ki sab nahin khulte

sabhī se ham nahīñ khulte ki sab nahīñ khulte

vagarna mahfil-e-yārāñ meñ kab nahīñ khulte

har ek shaḳhs ko husn-e-nazar nahīñ miltā

har ek shaḳhs pe sher-o-adab nahīñ khulte

yahāñ pe daad ko zanjīr ab nahīñ khiñchtī

yahāñ pe adl ko darvāze ab nahīñ khulte

kahīñ anā pe yaqīnan lagī hai choT na.ī

purāne zaḳhm yūñhī be-sabab nahīñ khulte

ye daur vo nahīñ phir bhī sharīf zādoñ ke

buzurg sāmne gar hoñ to lab nahīñ khulte

hamāre aib hameñ jo batā.e so mohsin

ki ā.inoñ pe bhī ḳhud ke aqab nahīñ khulte

kabhī 'naqīb' sabhī par khulī kitāb koī

kabhī to ham pe bhī ḳhud apne Dhab nahīñ khulte

sabhi se hum nahin khulte ki sab nahin khulte

wagarna mahfil-e-yaran mein kab nahin khulte

har ek shaKHs ko husn-e-nazar nahin milta

har ek shaKHs pe sher-o-adab nahin khulte

yahan pe dad ko zanjir ab nahin khinchti

yahan pe adl ko darwaze ab nahin khulte

kahin ana pe yaqinan lagi hai choT nai

purane zaKHm yunhi be-sabab nahin khulte

ye daur wo nahin phir bhi sharif zadon ke

buzurg samne gar hon to lab nahin khulte

hamare aib hamein jo batae so mohsin

ki aainon pe bhi KHud ke aqab nahin khulte

kabhi 'naqib' sabhi par khuli kitab koi

kabhi to hum pe bhi KHud apne Dhab nahin khulte