sabhi yahan hain darida-daman sabhi ka ab haal ek sa hai

sabhī yahāñ haiñ darīda-dāman sabhī kā ab haal ek sā hai

ab aisī sūrat meñ kis se pūchheñ ye kyā banā hai ye kyā huā hai

kuchh is tarah se kabhī huā thā sukūt dār-o-rasan kā aalam

na koī dīvāna sar-ba-kaf hai na koī vahshī DaTā huā hai

ye kyā maraz hai ki jis ke Dar se tamām duniyā laraz rahī hai

ye kyā vabā hai ki jis ke aage har ek kā sar jhukā huā hai

vo āsmānoñ pe jaane vaale vo chāñd se miTTī laane vaale

na jaane ab vo kahāñ ga.e haiñ har ek ghar meñ chhupā huā hai

vo sab missile ye saare atom bas ik corona kī maar nikle

ab aise aalam meñ dekh leñ sab ki chiin kaise DaTā huā hai

ye vā.izoñ ke tamām ḳhutbe hamārī mushkil kā hal nahīñ haiñ

ab is ko ḳhud ham hī hal kareñge ye mas.ala jo banā huā hai

na koī bhī ham pe pahra-zan hai ki ham kahīñ aa.eñ aur na jaa.eñ

har ek insān apne ghar meñ ḳhud apnā qaidī banā huā hai

koī baḌā ho ki yā ho chhoTā koī gadā ho ki bādshāh ho

is ibtilā kā kamāl ye hai ki sab ko yaksāñ kiyā huā hai

sivā.e ḳhāmosh chāñd tāroñ ke in ḳhalāoñ meñ kuchh nahīñ hai

ye zindagī kī hī raunaqeñ haiñ ki jin se mela sajā huā hai

ye kyā ġhazab hai ki muddatoñ se ḳhizāñ hī gulshan meñ ḳhema-zan hai

jo mausam-e-gul kā kārvāñ thā vo kārvāñ kyuuñ rukā huā hai

hamārā zauq-e-suḳhan hai jaarī use kisī shai kā Dar nahīñ hai

na husn ham se alag huā hai na ishq ham se judā huā hai

ḳhudā to un se ḳhafā hai 'aslam' jo us ke qānūn toḌte haiñ

vagarna ham aise be-basoñ se ḳhudā bhalā kab ḳhafā huā hai

sabhi yahan hain darida-daman sabhi ka ab haal ek sa hai

ab aisi surat mein kis se puchhen ye kya bana hai ye kya hua hai

kuchh is tarah se kabhi hua tha sukut dar-o-rasan ka aalam

na koi diwana sar-ba-kaf hai na koi wahshi DaTa hua hai

ye kya maraz hai ki jis ke Dar se tamam duniya laraz rahi hai

ye kya waba hai ki jis ke aage har ek ka sar jhuka hua hai

wo aasmanon pe jaane wale wo chand se miTTi lane wale

na jaane ab wo kahan gae hain har ek ghar mein chhupa hua hai

wo sab missile ye sare atom bas ek corona ki mar nikle

ab aise aalam mein dekh len sab ki chin kaise DaTa hua hai

ye waizon ke tamam KHutbe hamari mushkil ka hal nahin hain

ab is ko KHud hum hi hal karenge ye masala jo bana hua hai

na koi bhi hum pe pahra-zan hai ki hum kahin aaen aur na jaen

har ek insan apne ghar mein KHud apna qaidi bana hua hai

koi baDa ho ki ya ho chhoTa koi gada ho ki baadshah ho

is ibtila ka kamal ye hai ki sab ko yaksan kiya hua hai

siwae KHamosh chand taron ke in KHalaon mein kuchh nahin hai

ye zindagi ki hi raunaqen hain ki jin se mela saja hua hai

ye kya ghazab hai ki muddaton se KHizan hi gulshan mein KHema-zan hai

jo mausam-e-gul ka karwan tha wo karwan kyun ruka hua hai

hamara zauq-e-suKHan hai jari use kisi shai ka Dar nahin hai

na husn hum se alag hua hai na ishq hum se juda hua hai

KHuda to un se KHafa hai 'aslam' jo us ke qanun toDte hain

wagarna hum aise be-bason se KHuda bhala kab KHafa hua hai