sabr kahta hai ki rona kaisa

sabr kahtā hai ki ronā kaisā

hijr meñ jaan kā khonā kaisā

ġhair ne jhuuT kahā thā mujh se

yaar kā ghar meñ na honā kaisā

dard se tiir jigar kā khīñcho

ḳhuun meñ haath Dubonā kaisā

hijr kī raat burī hotī hai

aah ruktī nahīñ sonā kaisā

ishq meñ koī bashar laa.eq ho

is meñ barbād na honā kaisā

baad marne ke jo taḌpā mirā dil

shaq huā qabr kā konā kaisā

naam terā hai mire baa.is se

bahr-e-ġham mujh ko Dubonā kaisā

jal bhī jaa.e to na uf muñh se kare

ai sham.a rātoñ ko ronā kaisā

jo ki ho ḳhāk-nashīñ muddat se

us ko shaffāf bichhaunā kaisā

kahtā hai zabt ki tum sābir ho

dard ho dil meñ to ronā kaisā

dil-e-āshiq se numū hotā hai

tuḳhm-e-ulfat tirā bonā kaisā

ek din jaan mirī le fassād

roz nashtar kā chubhonā kaisā

ab bhī taklīf mujhe dete ho

jaao bhī laash pe ronā kaisā

kyā javānī ne sikhāyā hai tumheñ

le ke añgḌā.iyāñ sonā kaisā

kuchh kahā maiñ ne vo kahtā hai 'shafīq'

dukhḌā har roz kā ronā kaisā

sabr kahta hai ki rona kaisa

hijr mein jaan ka khona kaisa

ghair ne jhuT kaha tha mujh se

yar ka ghar mein na hona kaisa

dard se tir jigar ka khincho

KHun mein hath Dubona kaisa

hijr ki raat buri hoti hai

aah rukti nahin sona kaisa

ishq mein koi bashar laeq ho

is mein barbaad na hona kaisa

baad marne ke jo taDpa mera dil

shaq hua qabr ka kona kaisa

nam tera hai mere bais se

bahr-e-gham mujh ko Dubona kaisa

jal bhi jae to na uf munh se kare

ai shama raaton ko rona kaisa

jo ki ho KHak-nashin muddat se

us ko shaffaf bichhauna kaisa

kahta hai zabt ki tum sabir ho

dard ho dil mein to rona kaisa

dil-e-ashiq se numu hota hai

tuKHm-e-ulfat tera bona kaisa

ek din jaan meri le fassad

roz nashtar ka chubhona kaisa

ab bhi taklif mujhe dete ho

jao bhi lash pe rona kaisa

kya jawani ne sikhaya hai tumhein

le ke angDaiyan sona kaisa

kuchh kaha main ne wo kahta hai 'shafiq'

dukhDa har roz ka rona kaisa