sabr kar dil-e-nadan kis liye tu rota hai

sabr kar dil-e-nādāñ kis liye tū rotā hai

bevafā zamāne meñ kaun kis kā hotā hai

jis ko maiñ ne baḳhshe haiñ phuul shādmānī ke

ab vahī mire dil meñ ḳhār-e-ġham chubhotā hai

nā-murād ashkoñ se tar to ho gayā dāman

haañ magar lahū dil kā dil ke zaḳhm dhotā hai

kār-gāh-e-hastī meñ mutma.in nahīñ koī

dekh kar har ik sūrat aa.ina bhī rotā hai

vaqt yuuñ utar aayā zulm ke tarīqe par

roz ḳhūn-e-insāñ se āstīñ bhigotā hai

jo bhī īmāñ rakhtā hai maslahat-parastī par

gulshan-e-mohabbat meñ ġham ke biij botā hai

aa.ina haqīqat kā rakh ke sāmne dekhe

aadmī zamāne meñ ḳhud vaqār khotā hai

is qadar baḌhī 'arshad' zindagī kī hairānī

āj-kal har ik insāñ rote rote sotā hai

sabr kar dil-e-nadan kis liye tu rota hai

bewafa zamane mein kaun kis ka hota hai

jis ko main ne baKHshe hain phul shadmani ke

ab wahi mere dil mein KHar-e-gham chubhota hai

na-murad ashkon se tar to ho gaya daman

han magar lahu dil ka dil ke zaKHm dhota hai

kar-gah-e-hasti mein mutmain nahin koi

dekh kar har ek surat aaina bhi rota hai

waqt yun utar aaya zulm ke tariqe par

roz KHun-e-insan se aastin bhigota hai

jo bhi iman rakhta hai maslahat-parasti par

gulshan-e-mohabbat mein gham ke bij bota hai

aaina haqiqat ka rakh ke samne dekhe

aadmi zamane mein KHud waqar khota hai

is qadar baDhi 'arshad' zindagi ki hairani

aaj-kal har ek insan rote rote sota hai