سبز راتوں کا نہ چمکیلے دنوں کا رنگ ہے

سبز راتوں کا نہ چمکیلے دنوں کا رنگ ہے

سامنے آنکھوں کے بجھتا راکھ جیسا رنگ ہے

رنگ کی بنیاد پر تفریق ہے گہرا فریب

جسم کے اندر تو سب میں ایک جیسا رنگ ہے

ترش احساسات میں اب گھلتی جاتی ہے مٹھاس

تم جو آئے ہو تو ہر شے پر سنہرا رنگ ہے

میں تمہیں تصویر کہہ دوں تو برا مت ماننا

کتنے دلکش خال و خط ہیں کتنا اچھا رنگ ہے

جسم کی دھرتی پہ ہر جذبہ کھلا ہے پھول سا

لذتوں کی آنکھ میں ہر رنگ ہنستا رنگ ہے

دھند کے اس پار ہم ہیں اور سیاہی وقت کی

دھند کے اس پار سورج ہے سنہرا رنگ ہے

جب وفا کی دھوپ چمکے گی تو خود اڑ جائے گا

پیار کے رنگیں لباسوں پر جو کچا رنگ ہے