sabz raaton ka na chamkile dinon ka rang hai

sabz rātoñ kā na chamkīle dinoñ kā rang hai

sāmne āñkhoñ ke bujhtā raakh jaisā rang hai

rang kī buniyād par tafrīq hai gahrā fareb

jism ke andar to sab meñ ek jaisā rang hai

tursh ehsāsāt meñ ab ghultī jaatī hai miThās

tum jo aa.e ho to har shai par sunahrā rang hai

maiñ tumheñ tasvīr kah duuñ to burā mat mānñā

kitne dil-kash ḳhāl-o-ḳhat haiñ kitnā achchhā rang hai

jism kī dhartī pe har jazba khulā hai phuul sā

lazzatoñ kī aañkh meñ har rang hañstā rang hai

dhund ke is paar ham haiñ aur siyāhī vaqt kī

dhund ke us paar sūraj hai sunahrā rang hai

jab vafā kī dhuup chamkegī to ḳhud uḌ jā.egā

pyaar ke rangīñ libāsoñ par jo kachchā rang hai

sabz raaton ka na chamkile dinon ka rang hai

samne aankhon ke bujhta rakh jaisa rang hai

rang ki buniyaad par tafriq hai gahra fareb

jism ke andar to sab mein ek jaisa rang hai

tursh ehsasat mein ab ghulti jati hai miThas

tum jo aae ho to har shai par sunahra rang hai

main tumhein taswir kah dun to bura mat manna

kitne dil-kash KHal-o-KHat hain kitna achchha rang hai

jism ki dharti pe har jazba khula hai phul sa

lazzaton ki aankh mein har rang hansta rang hai

dhund ke is par hum hain aur siyahi waqt ki

dhund ke us par suraj hai sunahra rang hai

jab wafa ki dhup chamkegi to KHud uD jaega

pyar ke rangin libason par jo kachcha rang hai