sabza-e-KHat hai payambar ruKH hai quran-e-bahaar

sabza-e-ḳhat hai payambar ruḳh hai qur.ān-e-bahār

tū hai qibla tū hai ka.aba tū hai īmān-e-bahār

mere rone se huī fasl gulistān-e-bahār

ho gayā mīzāb-dīda miir sāmān-e-bahār

sarv ko jogī samajh kar faal khulvāne lagī

kyā ḳhizāñ meñ rahte haiñ bulbul ko armān-e-bahār

shāḳh-e-gul jumbish kahāñ karte haiñ matvāloñ kī tarah

bulbuloñ ke bose le lete haiñ mastān-e-bahār

hijr-e-be-ummīd-e-vaslat meñ koī jiinā bhī hai

bulbuloñ ke hote haiñ kuchh ahd-e-paimān-e-bahār

sarv ke misre ke ma.anī bulbuloñ se pūchh lo

andalīboñ se suno sharh-e-gulistān-e-bahār

zulf-e-gul ro ke gale mil kar jo aa.egī 'nasīm'

hogī sumbul af.ī-e-ganj-e-shahīdān-e-bahār

sabza-e-KHat hai payambar ruKH hai quran-e-bahaar

tu hai qibla tu hai kaba tu hai iman-e-bahaar

mere rone se hui fasl gulistan-e-bahaar

ho gaya mizab-dida mir saman-e-bahaar

sarw ko jogi samajh kar fal khulwane lagi

kya KHizan mein rahte hain bulbul ko arman-e-bahaar

shaKH-e-gul jumbish kahan karte hain matwalon ki tarah

bulbulon ke bose le lete hain mastan-e-bahaar

hijr-e-be-ummid-e-waslat mein koi jina bhi hai

bulbulon ke hote hain kuchh ahd-e-paiman-e-bahaar

sarw ke misre ke mani bulbulon se puchh lo

andalibon se suno sharh-e-gulistan-e-bahaar

zulf-e-gul ro ke gale mil kar jo aaegi 'nasim'

hogi sumbul afi-e-ganj-e-shahidan-e-bahaar