sabza hawa se awwalin barsat mein khula

sabza havā se avvalīñ barsāt meñ khulā

vo shaḳhs mujh se pahlī mulāqāt meñ khulā

rūh-o-dil-o-badan ke taqāze sarāb the

ye bhī azaab kashmakash-e-zāt meñ khulā

saare badan pe zaḳhm numāyāñ the din chaḌhe

shab bhar rahā thā koī merī ghaat meñ khulā

miTne the saare rang dhanak ke nigāh se

tahrīr ye bhī dukh thā mire haat meñ khulā

kaisā vo dost thā ki khulī dushmanī bhī kī

ḳhanjar chhupā ke rakh diyā sauġhāt meñ khulā

aa.e to nā-murād na jaa.e havā-e-ġham

darvāza ham ne chhoḌ diyā raat meñ khulā

sabza hawa se awwalin barsat mein khula

wo shaKHs mujh se pahli mulaqat mein khula

ruh-o-dil-o-badan ke taqaze sarab the

ye bhi azab kashmakash-e-zat mein khula

sare badan pe zaKHm numayan the din chaDhe

shab bhar raha tha koi meri ghat mein khula

miTne the sare rang dhanak ke nigah se

tahrir ye bhi dukh tha mere hat mein khula

kaisa wo dost tha ki khuli dushmani bhi ki

KHanjar chhupa ke rakh diya saughat mein khula

aae to na-murad na jae hawa-e-gham

darwaza hum ne chhoD diya raat mein khula