sach kaho kis ne liya dil ki jo paya na gaya

sach kaho kis ne liyā dil ki jo paayā na gayā

yaañ hamīñ tum haiñ koī aur na aaya na gayā

dil meñ thī aag lagī dīda-e-tar ko dekho

ghar jalā paas kā aur us se bujhāyā na gayā

din ye furqat kā baḌhā chaar pahar saa.at bhar

pā-e-dīvār se haT kar kahīñ saayā na gayā

dil taḌaptā rahā phir zo.af ke baa.is mujh se

zabt kā apne bhī ehsān uThāyā na gayā

dil mirā mar ke rahā aaTh pahar pahlū meñ

haa.e muhtāj kā murda thā uThāyā na gayā

va.ada kar kar ke jagāyā mujhe rātoñ ko magar

merī sotī huī qismat ko jagāyā na gayā

yā to ye shauq thā haal un ko sunā.ūñ jo mileñ

vaa.e qismat jo mile vo to sunāyā na gayā

ġhair jab ho gayā nārāz manāne ko ga.e

ek din ruuTh gayā maiñ to manāyā na gayā

bazm se us kī chale aao jo bigḌā vo but

baiThne ko koī fiqra bhī banāyā na gayā

mere marne kī ḳhabar sun ke bhalā kyā aate

un se ik baar ayādat ko bhī aaya na gayā

un kī mehñdī kī rahī ḳhuub jamālī rangat

ham se to rang bhī mahfil meñ jamāyā na gayā

miT ga.e sang-e-dar-e-yār pe ghis ghis ke jabīñ

apnī taqdīr ke likkhe ko miTāyā na gayā

donoñ majbūr rahe zo.af-o-nazākat ke sabab

ham vahāñ jā na sake yaar se aaya na gayā

duur baiThā huā bhī ham ko na vo dekh sake

bazm meñ ġhair ko pahlū se uThāyā na gayā

is nazākat pe na kyoñ jaan ko qurbāñ kar duuñ

ki gale par mire ḳhanjar bhī phirāyā na gayā

ek shab arsh pe mahbūb ko bulvā hī liyā

hijr vo ġham hai ḳhudā se bhī uThāyā na gayā

'bazm' tāqat ye ghaTī hijr kī shab aah jo kī

dil se lab tak ka.ī Thekoñ meñ bhī aaya na gayā

sach kaho kis ne liya dil ki jo paya na gaya

yan hamin tum hain koi aur na aaya na gaya

dil mein thi aag lagi dida-e-tar ko dekho

ghar jala pas ka aur us se bujhaya na gaya

din ye furqat ka baDha chaar pahar saat bhar

pa-e-diwar se haT kar kahin saya na gaya

dil taDapta raha phir zoaf ke bais mujh se

zabt ka apne bhi ehsan uThaya na gaya

dil mera mar ke raha aaTh pahar pahlu mein

hae muhtaj ka murda tha uThaya na gaya

wada kar kar ke jagaya mujhe raaton ko magar

meri soti hui qismat ko jagaya na gaya

ya to ye shauq tha haal un ko sunaun jo milen

wae qismat jo mile wo to sunaya na gaya

ghair jab ho gaya naraaz manane ko gae

ek din ruTh gaya main to manaya na gaya

bazm se us ki chale aao jo bigDa wo but

baiThne ko koi fiqra bhi banaya na gaya

mere marne ki KHabar sun ke bhala kya aate

un se ek bar ayaadat ko bhi aaya na gaya

un ki mehndi ki rahi KHub jamali rangat

hum se to rang bhi mahfil mein jamaya na gaya

miT gae sang-e-dar-e-yar pe ghis ghis ke jabin

apni taqdir ke likkhe ko miTaya na gaya

donon majbur rahe zoaf-o-nazakat ke sabab

hum wahan ja na sake yar se aaya na gaya

dur baiTha hua bhi hum ko na wo dekh sake

bazm mein ghair ko pahlu se uThaya na gaya

is nazakat pe na kyon jaan ko qurban kar dun

ki gale par mere KHanjar bhi phiraya na gaya

ek shab arsh pe mahbub ko bulwa hi liya

hijr wo gham hai KHuda se bhi uThaya na gaya

'bazm' taqat ye ghaTi hijr ki shab aah jo ki

dil se lab tak kai Thekon mein bhi aaya na gaya