sach zabanon par ho to shanon pe sar rahte nahin

sach zabānoñ par ho to shānoñ pe sar rahte nahīñ

pattharoñ ke shahr meñ shīshe ke ghar rahte nahīñ

chhoḌ kar mujh ko chalā hai to patā hogā use

reg-zāroñ meñ kabhī nāzuk shajar rahte nahīñ

chand lamhoñ ke liye milnā hai bas un kā nasīb

der tak shab aur sūraj ham-safar rahte nahīñ

koī kitnā bhī ho pyārā ho hī jaatā hai judā

zaḳhm jitne bhī hoñ gahre 'umr bhar rahte nahīñ

us kī āñdhī kī tarah fitrat baḌī pur-josh thī

aise mausam meñ diye hoñ yā sharar rahte nahīñ

yā to ho jaao mire yā chhoḌ do merā ḳhayāl

darmiyāne se marāsim mo'atabar rahte nahīñ

toḌ lenā shāḳh se ḳhud un ko behtar hai 'na'īm'

der tak pak kar daraḳhtoñ par samar rahte nahīñ

sach zabanon par ho to shanon pe sar rahte nahin

pattharon ke shahr mein shishe ke ghar rahte nahin

chhoD kar mujh ko chala hai to pata hoga use

reg-zaron mein kabhi nazuk shajar rahte nahin

chand lamhon ke liye milna hai bas un ka nasib

der tak shab aur suraj ham-safar rahte nahin

koi kitna bhi ho pyara ho hi jata hai juda

zaKHm jitne bhi hon gahre 'umr bhar rahte nahin

us ki aandhi ki tarah fitrat baDi pur-josh thi

aise mausam mein diye hon ya sharar rahte nahin

ya to ho jao mere ya chhoD do mera KHayal

darmiyane se marasim mo'atabar rahte nahin

toD lena shaKH se KHud un ko behtar hai 'na'im'

der tak pak kar daraKHton par samar rahte nahin