sachchai ki talKHi hai hum sada-bayanon mein

sachchā.ī kī talḳhī hai ham sāda-bayānoñ meñ

patthar kī haiñ buniyādeñ shīshe ke makānoñ meñ

jo chāho vo le jaao ehsās kī nagrī se

ḳhushiyāñ bhī haiñ aañsū bhī āñkhoñ kī dūkānoñ meñ

tum diip mohabbat ke palkoñ pe sajā lenā

baT jaa.e na ye duniyā tafrīq ke ḳhānoñ meñ

ye be-sar-o-sāmānī naḳhchīr bhī hañste haiñ

kuchh tiir na.e joḌo bosīda kamānoñ meñ

ham ahl-e-suḳhan daur-e-hāzir kī numā.ish meñ

har 'aib chhupā jaa.eñ sangīt kī tānoñ meñ

is rāh-e-mohabbat se 'jāved' gurez achchhā

Takrāoge bhaTkoge sunsān chaTānoñ meñ

sachchai ki talKHi hai hum sada-bayanon mein

patthar ki hain buniyaaden shishe ke makanon mein

jo chaho wo le jao ehsas ki nagri se

KHushiyan bhi hain aansu bhi aankhon ki dukanon mein

tum dip mohabbat ke palkon pe saja lena

baT jae na ye duniya tafriq ke KHanon mein

ye be-sar-o-samani naKHchir bhi hanste hain

kuchh tir nae joDo bosida kamanon mein

hum ahl-e-suKHan daur-e-hazir ki numaish mein

har 'aib chhupa jaen sangit ki tanon mein

is rah-e-mohabbat se 'jawed' gurez achchha

Takraoge bhaTkoge sunsan chaTanon mein