sad-haif ki kamzor hai chashman buDhapa

sad-haif ki kamzor hai chashmān buḌhāpā

sustī satī jumbish meñ hai dandān buḌhāpā

az bas-ki huā haigā guzar fasl-e-ḳhizāñ kā

raunaq nahīñ rakhtā hai gulistān buḌhāpā

arbal ke bhañvar meñ ga.ī hai Duub javānī

jis vaqt uThā jag mane tūfān buḌhāpā

tasbīh-o-musallā-o-asā ainak-o-ra.asha

joban ne diyā bhej ye sāmān buḌhāpā

ġhaflat kī ruī duur na kī shīsha-e-dil suuñ

mai-ḳhāne meñ mastāñ ne sun ilhān buḌhāpā

ash.ār haiñ tārīf sapedī kī sarāpā

is vāste rañgīñ nahīñ dīvān buḌhāpā

joban ke bhavan meñ lagī hai ātish-e-garmī

chhiḌke hai tahūr aab zamistān buḌhāpā

gardūñ kī tarah ḳham huā qad qaus-e-quzah kā

khīñchā hai magar zo.af suuñ kaivān buḌhāpā

amrāz kī afvāj kā yūrish hai badan par

is mulk meñ maġhlūb hai sultān buḌhāpā

ab bulbul-e-jāñ tañg huā tan ke qafas meñ

parvāz kare dekh ke zindān buḌhāpā

lazzat nahīñ detā hai dahan biich kasū ke

ai 'mubtalā' kyā sard haigā naan buḌhāpā

sad-haif ki kamzor hai chashman buDhapa

susti sati jumbish mein hai dandan buDhapa

az bas-ki hua haiga guzar fasl-e-KHizan ka

raunaq nahin rakhta hai gulistan buDhapa

arbal ke bhanwar mein gai hai Dub jawani

jis waqt uTha jag mane tufan buDhapa

tasbih-o-musalla-o-asa ainak-o-rasha

joban ne diya bhej ye saman buDhapa

ghaflat ki rui dur na ki shisha-e-dil sun

mai-KHane mein mastan ne sun ilhan buDhapa

ashaar hain tarif sapedi ki sarapa

is waste rangin nahin diwan buDhapa

joban ke bhawan mein lagi hai aatish-e-garmi

chhiDke hai tahur aab zamistan buDhapa

gardun ki tarah KHam hua qad qaus-e-quzah ka

khincha hai magar zoaf sun kaiwan buDhapa

amraaz ki afwaj ka yurish hai badan par

is mulk mein maghlub hai sultan buDhapa

ab bulbul-e-jaan tang hua tan ke qafas mein

parwaz kare dekh ke zindan buDhapa

lazzat nahin deta hai dahan bich kasu ke

ai 'mubtala' kya sard haiga nan buDhapa