صد مبارک ہو تمہی کو یہ تمہاری دنیا

صد مبارک ہو تمہی کو یہ تمہاری دنیا

رنج و نفرت سے بھری پیار سے عاری دنیا

ہم سے تقدیر کے ماروں کا نہ سوچا تم نے

صرف اپنی ہی سنواری جو سنواری دنیا

آپ منصف ہیں تو انصاف سے خود ہی کہہ دیں

کیا کبھی ایسی بھی ہوتی تھی ہماری دنیا

نظم عالم ہوا برہم جو بکھیریں زلفیں

اور گیسو جو سنوارے تو سنواری دنیا

کچھ تعلق تو ہمیں بھی ہے اسی سلطاں سے

در پہ آتی ہے جہاں بن کے بھکاری دنیا

اب کہ بیٹھے ہیں تصور میں جو ان کے سعدیؔ

ہم نے دیوار پہ دے ماری ہے ساری دنیا