sada baam-e-wafa se har kisi ko di gai lekin

sadā bām-e-vafā se har kisī ko dī ga.ī lekin

kisī meñ bhī yahāñ zauq-e-vafādārī nahīñ shāyad

ḳhulūs-o-mehr ke sho'loñ meñ jo tabdīl ho jaa.e

tumhāre dil meñ chāhat kī vo chingārī nahīñ shāyad

musalsal gāmzan hai apnī dhun meñ jānib-e-manzil

badan kā bojh merī ruuh par bhārī nahīñ shāyad

ġham-e-ulfat ko duniyā se chhupā kar maiñ kahāñ rakkhūñ

mire dil ke makāñ meñ koī almārī nahīñ shāyad

jahāñ par tum khaḌe ho vo ḳhud-ārā.ī kā parbat hai

vahāñ se nīche aane meñ to dushvārī nahīñ shāyad

mujhe ye baat kahne meñ jhijhak hotī nahīñ kuchh bhī

hamārā dabdaba duniyā pe ab taarī nahīñ shāyad

zamāna us ke rone kī adākārī kā qaa.il hai

mirā dil kah rahā hai ye adākārī nahīñ shāyad

tumhāre chhūne se dhaḌkan hamārī tez hotī hai

hameñ ai 'shād' lekin dil kī bīmārī nahīñ shāyad

sada baam-e-wafa se har kisi ko di gai lekin

kisi mein bhi yahan zauq-e-wafadari nahin shayad

KHulus-o-mehr ke sho'lon mein jo tabdil ho jae

tumhaare dil mein chahat ki wo chingari nahin shayad

musalsal gamzan hai apni dhun mein jaanib-e-manzil

badan ka bojh meri ruh par bhaari nahin shayad

gham-e-ulfat ko duniya se chhupa kar main kahan rakkhun

mere dil ke makan mein koi almari nahin shayad

jahan par tum khaDe ho wo KHud-arai ka parbat hai

wahan se niche aane mein to dushwari nahin shayad

mujhe ye baat kahne mein jhijhak hoti nahin kuchh bhi

hamara dabdaba duniya pe ab tari nahin shayad

zamana us ke rone ki adakari ka qail hai

mera dil kah raha hai ye adakari nahin shayad

tumhaare chhune se dhaDkan hamari tez hoti hai

hamein ai 'shad' lekin dil ki bimari nahin shayad