sada-bahaar jo the dard wo purane gae

sadā-bahār jo the dard vo purāne ga.e

hamāre saath meñ mausam bhī sab suhāne ga.e

tujhe ḳhabar nahīñ tāmīr-e-nau ke pāgal-pan

chhateñ girīñ to parindoñ ke āshiyāne ga.e

jahāñ sarāboñ kā ik mauj-mauj sūraj thā

vahīñ bhaḌaktī huī pyaas sab bujhāne ga.e

bikharne do kisī āvāra yaad kī ḳhushbū

ki bhuul jaane ke bhī ab use zamāne ga.e

us ek naqsh-e-gurezāñ pe dastaras kaisī

havā jo rūThī to rastoñ meñ ham manāne ga.e

vo ḳhud bhī TuuT gayā lams-e-dīda-var se 'aah'

mizāj phuul kā patthar se āzmāne ga.e

sada-bahaar jo the dard wo purane gae

hamare sath mein mausam bhi sab suhane gae

tujhe KHabar nahin tamir-e-nau ke pagal-pan

chhaten girin to parindon ke aashiyane gae

jahan sarabon ka ek mauj-mauj suraj tha

wahin bhaDakti hui pyas sab bujhane gae

bikharne do kisi aawara yaad ki KHushbu

ki bhul jaane ke bhi ab use zamane gae

us ek naqsh-e-gurezan pe dastaras kaisi

hawa jo ruThi to raston mein hum manane gae

wo KHud bhi TuT gaya lams-e-dida-war se 'ah'

mizaj phul ka patthar se aazmane gae