sada-e-dil hi ko aawaza-e-jahan na kaho

sadā-e-dil hī ko āvāza-e-jahāñ na kaho

ḳhud apnī hadd-e-nazar hī ko āsmāñ na kaho

har ek zarre ko hañstā diyā banānā hai

falak ke chāñd-sitāroñ kī dāstāñ na kaho

na laao yā to zabāñ par hadīs-e-nākāmī

nahīñ to apnī tamannā ko phir javāñ na kaho

ye apnā ghar hai chalo is pe tasfiya kar leñ

qafas kahūñ na ise maiñ tum āshiyāñ na kaho

na ittifāq-e-amal hai na ek samt-e-qadam

abhī to bhiiḌ hai ye is ko kārvāñ na kaho

ḳhasūmatoñ meñ ḳhirad kī jahāñ sune na sune

mire surūd-e-mohabbat ko rā.egāñ na kaho

jahāñ har ek ko sajde kā haq nahīñ hāsil

use ḳhudā-e-mohabbat kā āstāñ na kaho

ujaḌ bhī jaa.e nasheman to phir nasheman hai

qafas meñ phuul bhī rakh deñ to āshiyāñ na kaho

zamāna mujh pe nahīñ tum pe ḳhanda-zan hogā

tum aaj dostoñ 'mullā' ko nukta-dāñ na kaho

sada-e-dil hi ko aawaza-e-jahan na kaho

KHud apni hadd-e-nazar hi ko aasman na kaho

har ek zarre ko hansta diya banana hai

falak ke chand-sitaron ki dastan na kaho

na lao ya to zaban par hadis-e-nakaami

nahin to apni tamanna ko phir jawan na kaho

ye apna ghar hai chalo is pe tasfiya kar len

qafas kahun na ise main tum aashiyan na kaho

na ittifaq-e-amal hai na ek samt-e-qadam

abhi to bhiD hai ye is ko karwan na kaho

KHasumaton mein KHirad ki jahan sune na sune

mere surud-e-mohabbat ko raegan na kaho

jahan har ek ko sajde ka haq nahin hasil

use KHuda-e-mohabbat ka aastan na kaho

ujaD bhi jae nasheman to phir nasheman hai

qafas mein phul bhi rakh den to aashiyan na kaho

zamana mujh pe nahin tum pe KHanda-zan hoga

tum aaj doston 'mulla' ko nukta-dan na kaho