sada-e-dil ibaadat ki tarah thi

sadā-e-dil ibādat kī tarah thī

nazar shamā-shikāyat kī tarah thī

bahut kuchh kahne vaalā chup khaḌā thā

fazā ujlī sī hairat kī tarah thī

kahā dil ne ki baḌh ke us ko chhū luuñ

adā ḳhud hī ijāzat kī tarah thī

na aayā vo mire ham-rāh yuuñ to

magar ik shai rifāqat kī tarah thī

maiñ tez o sust baḌhtā jā rahā thā

havā harf-e-hidāyat kī tarah thī

na pūchh us kī nazar meñ kyā the meyār

pasand us kī ri.āyat kī tarah thī

milā ab ke vo ik chehra lagā.e

magar sab baat aadat kī tarah thī

na laḌtā maiñ ki thī chhoTī sī ik baat

magar aisī ki tohmat kī tarah thī

koī shai thī banī jo husn-e-iz.hār

mire dil meñ aziyyat kī tarah thī

sada-e-dil ibaadat ki tarah thi

nazar shama-shikayat ki tarah thi

bahut kuchh kahne wala chup khaDa tha

faza ujli si hairat ki tarah thi

kaha dil ne ki baDh ke us ko chhu lun

ada KHud hi ijazat ki tarah thi

na aaya wo mere ham-rah yun to

magar ek shai rifaqat ki tarah thi

main tez o sust baDhta ja raha tha

hawa harf-e-hidayat ki tarah thi

na puchh us ki nazar mein kya the meyar

pasand us ki riayat ki tarah thi

mila ab ke wo ek chehra lagae

magar sab baat aadat ki tarah thi

na laDta main ki thi chhoTi si ek baat

magar aisi ki tohmat ki tarah thi

koi shai thi bani jo husn-e-izhaar

mere dil mein aziyyat ki tarah thi