sada-e-mehr-o-mohabbat lagane aae hain

sadā-e-mehr-o-mohabbat lagāne aa.e haiñ

jo baar uTh nahīñ saktā uThāne aa.e haiñ

ye kaisā aib hai mere nagar ke logoñ meñ

diye jalā na sake to bujhāne aa.e haiñ

jo be-hunar haiñ zarā un kā hausla dekho

vo dūsroñ ke hunar āzmāne aa.e haiñ

ajiib log haiñ pindār bechne ke liye

ḳhud apne aap kī qīmat lagāne aa.e haiñ

munāfiqat ke usūloñ pe ham nahīñ zinda

jo aap sun nahīñ sakte sunāne aa.e haiñ

chalī hai bād-e-muḳhālif to ġham nahīñ hai ki ham

charāġh apne lahū se jalāne aa.e haiñ

sada-e-mehr-o-mohabbat lagane aae hain

jo bar uTh nahin sakta uThane aae hain

ye kaisa aib hai mere nagar ke logon mein

diye jala na sake to bujhane aae hain

jo be-hunar hain zara un ka hausla dekho

wo dusron ke hunar aazmane aae hain

ajib log hain pindar bechne ke liye

KHud apne aap ki qimat lagane aae hain

munafiqat ke usulon pe hum nahin zinda

jo aap sun nahin sakte sunane aae hain

chali hai baad-e-muKHalif to gham nahin hai ki hum

charagh apne lahu se jalane aae hain