sada-e-sang daman-gir thi pal pal bahut roya

sadā-e-sañg dāman-gīr thī pal pal bahut royā

ghanī ābādiyoñ se lauT kar pāgal bahut royā

mire khetoñ ko sahrā kar gayā bastī ko vīrāna

magar dariyā pe jab pahuñchā to ye bādal bahut royā

mire kamre kī tanhā.ī meñ gahrī tīrgī phailī

kisī kī aañkh kā lagtā hai phir kājal bahut royā

vo jab bhī rizq ke sūraj se jal bhun kar huā vāpas

to us kī būḌhī maañ kā be-qarār āñchal bahut royā

phir ab ke us kī sakhiyoñ ke ghar āñgan phuul khil uTThe

phir ab ke saal us kī god kā chāval bahut royā

faqat ye baat ki ābādiyoñ meñ sar uchhalte haiñ

darinde ban ga.e insān to jangal bahut royā

hamāre ahd kā gautam bhī qātil-dost hai 'anvar'

bas itnī sī ḳhabar par sāya-e-pīpal bahut royā

sada-e-sang daman-gir thi pal pal bahut roya

ghani aabaadiyon se lauT kar pagal bahut roya

mere kheton ko sahra kar gaya basti ko virana

magar dariya pe jab pahuncha to ye baadal bahut roya

mere kamre ki tanhai mein gahri tirgi phaili

kisi ki aankh ka lagta hai phir kajal bahut roya

wo jab bhi rizq ke suraj se jal bhun kar hua wapas

to us ki buDhi man ka be-qarar aanchal bahut roya

phir ab ke us ki sakhiyon ke ghar aangan phul khil uTThe

phir ab ke sal us ki god ka chawal bahut roya

faqat ye baat ki aabaadiyon mein sar uchhalte hain

darinde ban gae insan to jangal bahut roya

hamare ahd ka gautam bhi qatil-dost hai 'anwar'

bas itni si KHabar par saya-e-pipal bahut roya