sada-e-shauq sukut-e-labi se sharminda

sadā-e-shauq sukūt-e-labī se sharminda

darūñ kā shor mirī ḳhāmushī se sharminda

kaho to aaj zarā sā sañvār luuñ ḳhud ko

ki aa.ine haiñ mirī sādgī se sharminda

ajiib dohrī izzat kā sāmnā hai unheñ

koī kisī se to koī kisī se sharminda

hamāre haath jo dastak na de sake dar par

hamāre haath rahe is kajī se sharminda

ham apnī ḳhaak jahāñ meñ uḌaa.e phirte haiñ

ai shahr-e-yār tumhārī galī se sharminda

ham is sadī meñ bhī manzil se āshnā na hue

ye aur baat hai pichhlī sadī se sharminda

hai mere paas ye luknat-zada zabāñ 'shāhid'

ai ḳhush-kalām tirī naġhmagī se sharminda

sada-e-shauq sukut-e-labi se sharminda

darun ka shor meri KHamushi se sharminda

kaho to aaj zara sa sanwar lun KHud ko

ki aaine hain meri sadgi se sharminda

ajib dohri izzat ka samna hai unhen

koi kisi se to koi kisi se sharminda

hamare hath jo dastak na de sake dar par

hamare hath rahe is kaji se sharminda

hum apni KHak jahan mein uDae phirte hain

ai shahr-e-yar tumhaari gali se sharminda

hum is sadi mein bhi manzil se aashna na hue

ye aur baat hai pichhli sadi se sharminda

hai mere pas ye luknat-zada zaban 'shahid'

ai KHush-kalam teri naghmagi se sharminda