sada fikr-e-rozi hai ta zindagi hai

sadā fikr-e-rozī hai tā zindagī hai

jo jiinā yahī hai to kyā zindagī hai

chhupā muñh na apnā ki mar jā.eñge ham

parī-rū tirā dekhnā zindagī hai

mujhe ḳhizr se do na jiine meñ nisbat

ki us kī ba-āb-e-baqā zindagī hai

tirī bevafā.ī kā shikva kareñ kyā

ḳhud apnī hī yaañ bevafā zindagī hai

ajal ke sivā us kī daarū nahīñ kuchh

ajab dard dūr-az-davā zindagī hai

tū gulshan meñ rah gul ye kahtā thā us se

tire dam se merī sabā zindagī hai

jinhoñ ne kiyā hai dil ā.īna apnā

unhīñ logoñ kī bā-safā zindagī hai

kahāñ kī havā tak rahā hai tū nādāñ

ki pal mārte yaañ havā zindagī hai

na ham muft marte haiñ kū-e-butāñ meñ

ki marne se yaañ mudda.ā zindagī hai

tū ai 'mus.hafī' gar hai āshiq fanā ho

ki āshiq ko bād-az-fanā zindagī hai

sada fikr-e-rozi hai ta zindagi hai

jo jina yahi hai to kya zindagi hai

chhupa munh na apna ki mar jaenge hum

pari-ru tera dekhna zindagi hai

mujhe KHizr se do na jine mein nisbat

ki us ki ba-ab-e-baqa zindagi hai

teri bewafai ka shikwa karen kya

KHud apni hi yan bewafa zindagi hai

ajal ke siwa us ki daru nahin kuchh

ajab dard dur-az-dawa zindagi hai

tu gulshan mein rah gul ye kahta tha us se

tere dam se meri saba zindagi hai

jinhon ne kiya hai dil aaina apna

unhin logon ki ba-safa zindagi hai

kahan ki hawa tak raha hai tu nadan

ki pal marte yan hawa zindagi hai

na hum muft marte hain ku-e-butan mein

ki marne se yan muddaa zindagi hai

tu ai 'mushafi' gar hai aashiq fana ho

ki aashiq ko baad-az-fana zindagi hai