sada hai is aah-o-chashm-e-tar se falak pe bijli zamin pe baran

sadā hai is āh-o-chashm-e-tar se falak pe bijlī zamīñ pe bārāñ

nikal ke dekho tum apne ghar se falak pe bijlī zamīñ pe bārāñ

vo shola-rū hai savār-e-tausan aur us kā tausan araq-fishāñ hai

ajab hai ik sair dopahar se falak pe bijlī zamīñ pe bārāñ

hañse hai koThe pe merā yūsuf maiñ zer-e-dīvār ro rahā huuñ

azīzo dekho mirī nazar se falak pe bijlī zamīñ pe bārāñ

patañg kyūñkar na hove hairāñ ki sham.a shab ko dikhā rahī hai

ba-chashm-e-giryāñ o tāj-e-zar se falak pe bijlī zamīñ pe bārāñ

nahā ke afshāñ chuno jabīñ par nichoḌo bāloñ ko ba.ad is ke

dikhāo āshiq ko is hunar se falak pe bijlī zamīñ pe bārāñ

kahāñ hai juuñ sho.ala shāḳh par gul kidhar hai fasl-e-bahār shabnam

tire hai e.ajāz-e-Turfa-tar se falak pe bijlī zamīñ pe bārāñ

karo na dariyā pe mai-kashī tum udhar ko aao to maiñ dikhā.ūñ

sarishk-e-har-nāla-o-jigar se falak pe bijlī zamīñ pe bārāñ

kidhar ko jā.ūñ nikal ke yā-rab ki garm-o-sard-e-zamāna mujh ko

dikhā.e hai shaam tak sahar se falak pe bijlī zamīñ pe bārāñ

vo teġh khīñche hue hai sar par maiñ sar jhukā.e huuñ ashk-e-rezāñ

dikhā.ūñ ai dil tujhe kidhar se falak pe bijlī zamīñ pe bārāñ

ġhazab se chīñ-bar-jabīñ dikhā.e badan se Tapke bhī hai pasīna

ayaañ hai yaaro na.e hunar se falak pe bijlī zamīñ pe bārāñ

'nasīr' likkhī hai kyā ġhazal ye ki dil taḌaptā hai sun ke jis ko

bañdhe hai yuuñ kab kisī bashar se falak pe bijlī zamīñ pe bārāñ

sada hai is aah-o-chashm-e-tar se falak pe bijli zamin pe baran

nikal ke dekho tum apne ghar se falak pe bijli zamin pe baran

wo shola-ru hai sawar-e-tausan aur us ka tausan araq-fishan hai

ajab hai ek sair dopahar se falak pe bijli zamin pe baran

hanse hai koThe pe mera yusuf main zer-e-diwar ro raha hun

azizo dekho meri nazar se falak pe bijli zamin pe baran

patang kyunkar na howe hairan ki shama shab ko dikha rahi hai

ba-chashm-e-giryan o taj-e-zar se falak pe bijli zamin pe baran

naha ke afshan chuno jabin par nichoDo baalon ko baad is ke

dikhao aashiq ko is hunar se falak pe bijli zamin pe baran

kahan hai jun shoala shaKH par gul kidhar hai fasl-e-bahaar shabnam

tere hai eajaz-e-Turfa-tar se falak pe bijli zamin pe baran

karo na dariya pe mai-kashi tum udhar ko aao to main dikhaun

sarishk-e-har-nala-o-jigar se falak pe bijli zamin pe baran

kidhar ko jaun nikal ke ya-rab ki garm-o-sard-e-zamana mujh ko

dikhae hai sham tak sahar se falak pe bijli zamin pe baran

wo tegh khinche hue hai sar par main sar jhukae hun ashk-e-rezan

dikhaun ai dil tujhe kidhar se falak pe bijli zamin pe baran

ghazab se chin-bar-jabin dikhae badan se Tapke bhi hai pasina

ayan hai yaro nae hunar se falak pe bijli zamin pe baran

'nasir' likkhi hai kya ghazal ye ki dil taDapta hai sun ke jis ko

bandhe hai yun kab kisi bashar se falak pe bijli zamin pe baran