سدا پاؤں میں بیڑی ہاتھوں میں زنجیر دیکھی ہے

سدا پاؤں میں بیڑی ہاتھوں میں زنجیر دیکھی ہے

وفاداران الفت کی یہی تقدیر دیکھی ہے

کریں نوحہ پڑھیں کیوں مرثیہ آہ و بکا کیوں ہو

وہ زندہ ہیں انہیں کی دہر میں تنویر دیکھی ہے

محل مسمار ہو کر بھی ثقافت زندہ رکھتے ہیں

جبین سنگ پر ہم نے یہی تحریر دیکھی ہے

سبھی کو زندگی پیاری ہے لیکن اس طرح جینا

نوالوں کے لئے اکثر غلط تدبیر دیکھی ہے

دعائیں وصل کی مانگی وہ آئے ہیں دم نزع

عجب تقدیر دیکھی ہے عجب تاثیر دیکھی ہے

کھلی آنکھوں سے ہم نے بھی خوشی کے خواب دیکھے تھے

مگر مونسؔ بگڑتی بارہا تعبیر دیکھی ہے