sada rang-e-mina chamakta raha

sadā rañg-e-mīnā chamaktā rahā

hamesha ye sabza lahaktā rahā

vo kūcha hai ulfat kā jis meñ sadā

ḳhizar raah bhūlā bhaTaktā rahā

khulā ye jahāñ parda-e-dar hilā

jahāñ jo rahā sar paTaktā rahā

batā lāġharī se hai par baal bhī

maiñ āñkhoñ meñ sab kī khaTaktā rahā

labālab yahāñ ho chukā jām-e-umr

vahāñ sāġhar-e-mai chhalaktā rahā

barastī rahī qabr par bekasī

ġharīboñ kā madfan Tapaktā rahā

rahā na.ara-zan kū-e-jānāñ meñ 'shād'

gulistāñ meñ bulbul chahaktā rahā

sada rang-e-mina chamakta raha

hamesha ye sabza lahakta raha

wo kucha hai ulfat ka jis mein sada

KHizar rah bhula bhaTakta raha

khula ye jahan parda-e-dar hila

jahan jo raha sar paTakta raha

bata laghari se hai par baal bhi

main aankhon mein sab ki khaTakta raha

labaalab yahan ho chuka jam-e-umr

wahan saghar-e-mai chhalakta raha

barasti rahi qabr par bekasi

gharibon ka madfan Tapakta raha

raha nara-zan ku-e-jaanan mein 'shad'

gulistan mein bulbul chahakta raha