sadaon ka na KHala dekh kar Dara mujhko

sadāoñ kā na ḳhalā dekh kar Darā mujh ko

hai koī aur bhī sunñe to de zarā mujh ko

qarīb apne jo aayā to laḌkhaḌā sā gayā

tū merī fikr na kar kuchh nahīñ huā mujh ko

maiñ barf bechne niklā bhī to himāle meñ

aur us ke baad zamāne se hai gila mujh ko

ye kaise dard haiñ jo rah ga.e haiñ baTne se

ye kaisī guuñj hai kuchh bhī nahīñ milā mujh ko

maiñ dekh kar tujhe ik samt ho sā jaatā huuñ

ye milte milte pare kaise kar diyā mujh ko

na tū bulā.e mujhe aur na maiñ bulā.ūñ tujhe

ye kyā huā hai tujhe aur kyā huā mujh ko

ḳhalā meñ rāste girte hoñ ābshār kī misl

vo dhuup ho nazar aa.e na rāsta mujh ko

ye mauj mauj sī āvāz kashtiyoñ kī sī chup

qadam banā huuñ añdheroñ kā ab baḌhā mujh ko

maiñ chup kī khaa.ī kā hotā ik aur patthar aaj

mirī sadā hī ne kas kar jakaḌ liyā mujh ko

maiñ ḳhud ko Dhaal ke terī sadā meñ chāhtā huuñ

ki tū bhī ab kabhī merī tarah bulā mujh ko

maiñ kyā vo ḳhauf huuñ jo sab ke dil meñ baiThā hai

nahīñ to but se bane dekhte ho kyā mujh ko

maiñ ek shaam tire saath rah ke luT sā gayā

ki zindagī meñ ye lahja nahīñ milā mujh ko

phir aaj ghar mujhe le aa.ī juuñ kā tuuñ ik baat

ki jaise koī khaḌā dekhtā rahā mujh ko

udhar kināre pe bhī 'talḳh' meñ hī thā kal shaam

bas apne ḳhauf ne milne nahīñ diyā mujh ko

sadaon ka na KHala dekh kar Dara mujh ko

hai koi aur bhi sunne to de zara mujh ko

qarib apne jo aaya to laDkhaDa sa gaya

tu meri fikr na kar kuchh nahin hua mujh ko

main barf bechne nikla bhi to himale mein

aur us ke baad zamane se hai gila mujh ko

ye kaise dard hain jo rah gae hain baTne se

ye kaisi gunj hai kuchh bhi nahin mila mujh ko

main dekh kar tujhe ek samt ho sa jata hun

ye milte milte pare kaise kar diya mujh ko

na tu bulae mujhe aur na main bulaun tujhe

ye kya hua hai tujhe aur kya hua mujh ko

KHala mein raste girte hon aabshaar ki misl

wo dhup ho nazar aae na rasta mujh ko

ye mauj mauj si aawaz kashtiyon ki si chup

qadam bana hun andheron ka ab baDha mujh ko

main chup ki khai ka hota ek aur patthar aaj

meri sada hi ne kas kar jakaD liya mujh ko

main KHud ko Dhaal ke teri sada mein chahta hun

ki tu bhi ab kabhi meri tarah bula mujh ko

main kya wo KHauf hun jo sab ke dil mein baiTha hai

nahin to but se bane dekhte ho kya mujh ko

main ek sham tere sath rah ke luT sa gaya

ki zindagi mein ye lahja nahin mila mujh ko

phir aaj ghar mujhe le aai jun ka tun ek baat

ki jaise koi khaDa dekhta raha mujh ko

udhar kinare pe bhi 'talKH' mein hi tha kal sham

bas apne KHauf ne milne nahin diya mujh ko