sadaqat sadgi oDhe bulandi tham leti hai

sadāqat sādgī oḌhe bulandī thaam letī hai

shahanshah kī rasā.ī ko faqīrī thaam letī hai

ulajh kar rañg-o-bū meñ ishq kī ma.asūm sī bachchī

miThā.ī kī dukānoñ meñ jalebī thaam letī hai

maiñ us ke rū-ba-rū har baat apnī bhuul jaatā huuñ

vo kuchh kahne jo aatī hai sahelī thaam letī hai

ye kis kā dil dukhā kar apne gaañv se maiñ niklā huuñ

galī har moḌ par merī kalā.ī thaam letī hai

bayāñ apnā badal kar aa gayā hai jab se fariyādī

gavāhī dene vāloñ ko kachehrī thaam letī hai

karam kā shukriya lekin na samho nā-samajh ham ko

navāzish kā har ik maqsad ġharībī thaam letī hai

koī ḳhushbū javāñ hotī hai mere gaañv meñ jab bhī

havā yuuñ ruḳh badaltī hai havelī thaam letī hai

mirī sairābiyoñ ko tishnagī par chhoḌ do yaaro

ye nāgin ḳhud-ba-ḳhud apnā madārī thaam letī hai

yahāñ ik sham.a raushan karnā bhī āsāñ nahīñ itnā

zarā sī chuuk hone par hathelī thaam letī hai

qasīda kyā likhūñ 'sāgar' tumhārī shān-o-shaukat kā

yahāñ to bādshāhat bhī kaTorī thaam letī hai

sadaqat sadgi oDhe bulandi tham leti hai

shahanshah ki rasai ko faqiri tham leti hai

ulajh kar rang-o-bu mein ishq ki masum si bachchi

miThai ki dukanon mein jalebi tham leti hai

main us ke ru-ba-ru har baat apni bhul jata hun

wo kuchh kahne jo aati hai saheli tham leti hai

ye kis ka dil dukha kar apne ganw se main nikla hun

gali har moD par meri kalai tham leti hai

bayan apna badal kar aa gaya hai jab se fariyaadi

gawahi dene walon ko kachehri tham leti hai

karam ka shukriya lekin na samho na-samajh hum ko

nawazish ka har ek maqsad gharibi tham leti hai

koi KHushbu jawan hoti hai mere ganw mein jab bhi

hawa yun ruKH badalti hai haweli tham leti hai

meri sairabiyon ko tishnagi par chhoD do yaro

ye nagin KHud-ba-KHud apna madari tham leti hai

yahan ek shama raushan karna bhi aasan nahin itna

zara si chuk hone par hatheli tham leti hai

qasida kya likhun 'sagar' tumhaari shan-o-shaukat ka

yahan to baadshahat bhi kaTori tham leti hai