sadiyon ki shab-e-gham ko sahar humne banaya

sadiyoñ kī shab-e-ġham ko sahar ham ne banāyā

zarrāt ko ḳhurshīd o qamar ham ne banāyā

taḳhlīq añdheroñ se kiye ham ne ujāle

har shab ko ik aivān-e-sahar ham ne banāyā

barfāb ke siine meñ kiyā ham ne charāġhāñ

har mauja-e-dariyā ko sharar ham ne banāyā

shabnam se nahīñ, rañg diyā dil ke lahū se

har ḳhaar ko barg-e-gul-e-tar ham ne banāyā

har ḳhaar ke siine meñ chaman ham ne khilā.e

har phuul ko firdaus-e-nazar ham ne banāyā

raftār ko khilte hue ġhunchoñ kī sadā dī

har gaam ko ik ḳhuld-e-nazar ham ne banāyā

har ruḳh se tire husn kī zau phuuT rahī hai

kyā zāviya-e-fikr-o-nazar ham ne banāyā

ashkoñ ko shafaq-rañg kiyā ḳhūn-e-jigar se

kyā ġhāza-e-ruḳhsār-e-sahar ham ne banāyā

Dhalte haiñ jahāñ bāda-e-tajdīd ke sāġhar

vo mai-kada-e-fikr-o-nazar ham ne banāyā

sadiyon ki shab-e-gham ko sahar hum ne banaya

zarraat ko KHurshid o qamar hum ne banaya

taKHliq andheron se kiye hum ne ujale

har shab ko ek aiwan-e-sahar hum ne banaya

barfab ke sine mein kiya hum ne charaghan

har mauja-e-dariya ko sharar hum ne banaya

shabnam se nahin, rang diya dil ke lahu se

har KHar ko barg-e-gul-e-tar hum ne banaya

har KHar ke sine mein chaman hum ne khilae

har phul ko firdaus-e-nazar hum ne banaya

raftar ko khilte hue ghunchon ki sada di

har gam ko ek KHuld-e-nazar hum ne banaya

har ruKH se tere husn ki zau phuT rahi hai

kya zawiya-e-fikr-o-nazar hum ne banaya

ashkon ko shafaq-rang kiya KHun-e-jigar se

kya ghaza-e-ruKHsar-e-sahar hum ne banaya

Dhalte hain jahan baada-e-tajdid ke saghar

wo mai-kada-e-fikr-o-nazar hum ne banaya