sadiyon se insan ye sunta aaya hai

sadiyoñ se insān ye suntā aayā hai

dukh kī dhuup ke aage sukh kā saayā hai

ham ko in sastī ḳhushiyoñ kā lobh na do

ham ne soch samajh kar ġham apnāyā hai

jhuuT to qātil Thahrā is kā kyā ronā

sach ne bhī insāñ kā ḳhuuñ bahāyā hai

paidā.ish ke din se maut kī zad meñ haiñ

is maqtal meñ kaun hameñ le aayā hai

avval avval jis dil ne barbād kiyā

āḳhir āḳhir vo dil hī kaam aayā hai

itne din ehsān kiyā dīvānoñ par

jitne din logoñ ne saath nibhāyā hai

sadiyon se insan ye sunta aaya hai

dukh ki dhup ke aage sukh ka saya hai

hum ko in sasti KHushiyon ka lobh na do

hum ne soch samajh kar gham apnaya hai

jhuT to qatil Thahra is ka kya rona

sach ne bhi insan ka KHun bahaya hai

paidaish ke din se maut ki zad mein hain

is maqtal mein kaun hamein le aaya hai

awwal awwal jis dil ne barbaad kiya

aaKHir aaKHir wo dil hi kaam aaya hai

itne din ehsan kiya diwanon par

jitne din logon ne sath nibhaya hai