sadiyon se main is aankh ki putli mein chhupa tha

sadiyoñ se maiñ is aañkh kī putlī meñ chhupā thā

palkoñ pe agar mujh ko sajā lete to kyā thā

tū phail gayā tā-ba-ufuq mujh se bichhaḌ kar

maiñ jism ke zindāñ meñ tujhe DhūñDh rahā thā

haañ mujh ko tire surḳh kajāve kī qasam hai

is raah meñ pahle koī ghuñghrū na bajā thā

guzre the mire sāmne tum dosh-e-havā par

maiñ duur kahīñ ret ke Tiile pe khaḌā thā

siine meñ ubharte hue sūraj kā talātum

āñkhoñ meñ tirī Dūbtī rātoñ kā nasha thā

guzrā na idhar se koī patthar kā pujārī

muddat se maiñ is raah ke māthe pe sajā thā

jab vaqt kī dahlīz pe shab kaañp rahī thī

sho.ala sā mire jism ke āñgan se uThā thā

ab jāniye kyā naqsh havāoñ ne banā.e

us ret pe maiñ ne to tirā naam likhā thā

ai dīda-e-hairāñ to zarā aur qarīb aa

ai DhūñDne vaale maiñ tujhe DhūñDh rahā thā

sadiyon se main is aankh ki putli mein chhupa tha

palkon pe agar mujh ko saja lete to kya tha

tu phail gaya ta-ba-ufuq mujh se bichhaD kar

main jism ke zindan mein tujhe DhunDh raha tha

han mujh ko tere surKH kajawe ki qasam hai

is rah mein pahle koi ghunghru na baja tha

guzre the mere samne tum dosh-e-hawa par

main dur kahin ret ke Tile pe khaDa tha

sine mein ubharte hue suraj ka talatum

aankhon mein teri Dubti raaton ka nasha tha

guzra na idhar se koi patthar ka pujari

muddat se main is rah ke mathe pe saja tha

jab waqt ki dahliz pe shab kanp rahi thi

shoala sa mere jism ke aangan se uTha tha

ab jaaniye kya naqsh hawaon ne banae

us ret pe main ne to tera nam likha tha

ai dida-e-hairan to zara aur qarib aa

ai DhunDne wale main tujhe DhunDh raha tha